NAKUAGA RAMADHANI

1.     Sina budi kukuaga                       Karimu wetu mgeni

Nyoyo wazitoa woga                     Hata khofu hatuoni

Kwa madhambi kujitenga           Heshima yako Fulani

2.     Unakuja na mapenzi                     Mjo wako una kheri

Thalathini siku hizi                       Zino neema kathiri

Na nyoyo huwa ziwazi                  Na roho zina nawiri

3.     Wewe bwana wa baraka               Wewe kinga ya maasi

Wewe Mola kakuweka                  Utukinge sisi nasi

Wewe kesho kiondoka                   Mambo hayawi mepesi

4.     Ewe bwana Ramadhani                 Kutuaga budi huna

Kwa amri ya Rahmani                   Si haba tumekutana

Jee ? ifikapo mwakani                   Habiby tutaonana ?

5.     Wakati ukiwadiya                           Karibu na kuondoka

Nyoyo giza huingiya                        Na nuru inatoweka

Hukumbuka mazoweya                  Na pendo unotuvika

6.     Hatuna budi kuliya                        Machozi kutumwaika

Kwa vile utapoteya                         Kwa miezi kadhalika

Hapo utaporejeya                           Mpaka mwaka ukifika

7.     Kwa kheri wetu azizi                     Kwa kheri ya kuonana

Wewe bora ya mlezi                       Mfano wako hakuna

Yako matamu mpenzi                    Yajayo machungu sana

8.     Kesho siku ya hesabu                     Ubavuni utasimama

Jawabu wewe tajibu                       Ya haki utayasema

Tukifanya ya wajibu                       Aloyataka Karima

9.     Mmoja wa waokozi                          Nasi twakutegemeya

Tuliziona upuuzi                              Anasa za hii duniya

Kuwa wetu muelezi                          Mola anakusikiya

10.     Buriyani Ramadhani                       Inshaalla tutaonana

Iwapo si duniyani                            Akhera tutakutana

Wallahi una imani                           Na baraka nyingi sana.

Nakutakieni kila la kheri Eid hii naa aila zenu.na jamaa zenu

Eid Mubarak