Habari

UWT Zanzibar Wawataka Kuchangamkia Fursa

Na.IS-HAKA OMAR, ZANZIBAR.
UMOJA wa Wanawake wa Chama cha Mapinduzi Tanzania (UWT) umewataka wanawake kuchangamkia fursa za Uongozi wa ngazi mbali mbali kupitia uchaguzi unaondelea hivi sasa ndani ya Chama na jumuiya zake.

Wito huo umetolewa Kaimu Katibu Mkuu wa Umoja huo Zanzibar Bi.Tunu Juma Kondo katika mwendelezo wa ziara ya UWT ya kuzungumza na Viongozi wapya wa ngazi za matawi wa umoja huo uko Jimbo la Kijini Wilaya ya Kaskazini “A” kichama Unguja.

Awambia Akina Mama hao kuwa Uchaguzi wa ngazi mbali mbali unaoendelea katika taasisi hiyo ndio fursa moja wapo ya wanawake kupata nafasi za uongozi ili waweze kufikia malengo ya kupata uwakilishi wa viongozi wenye idadi sawa na wanaume ndani ya Chama hicho.

Alifafanua kuwa wanawake wanatakiwa kuondokana na dhana ya kuendelea kuongozwa kwa kila nafasi za uongozi ndani ya CCM bali wanatakiwa kujiongeza kwa kuwania wenyewe uongozi ndani ya chama hicho ili kuleta maendeleo endelevu ndani ya chama na jumuiya zake.

Pia alisisitiza viongozi hao kuwa pamoja na majukumu ya kiuongozi waliyonayo ni lazima wawahamasishe kwa wingi wanawake kuwania nafasi za uongozi ili kupata viongozi makini na wenye uwezo wa kwenda na kasi za kiutendaji za chama hicho.

“Wanawake wenzangu tutumieni fursa ya Uchaguzi wa Chama kuwania nafasi mbali mbali za uongozi , tusisubiri nafasi za uteuzi bali tusimame wenyewe kupambana kwa kuhakikisha nasi tunakuwa na nyadhifa za uongozi kama walivyo wanaume kwani tunaweza wenyewe bila ya kuwezeshwa’’,. Alisema Bi.Tunu.

Akizungumza katika ziara hiyo Katibu Msaidizi Idara ya Organazesheni UWT Zanzibar, Bi. Mgeni Ottow Alisema CCM atadumu madarakani endapo viongozi mbali mbali wanaopatikana kupitia uchaguzi wa chama hicho watakuwa na uzalendo wa kweli katika kulinda maslahi ya taasisi hiyo kwa vitendo.

Bi. Mgeni aliwasihi Akina Mama wa Umoja huo kuhakikisha wanachagua viongozi waadilifu na wenye uwezo wa kubuni fursa mbali mbali za maendeleo zitakazowanufaisha wanawake wenzao na chama kwa ujumla.

“ Wanawake ndio tegemeo la Chama chetu na jumuiya kwa ujumla hivyo lazima tuwe wa kwanza kujitokeza kwa kila tukio linalohusu uimarishaji wa chama chetu hasa michakato ya uchaguzi na tukiwa wengi katika nafasi za uongozi ndipo tutakapopata nguvu za pamoja kutetea haki zetu na kupinga kisheria udhalilishaji wa Wanawake”,. Aliseleza Bi. Mgeni.

Kwa Upande wake Mwenyekiti wa UWT Mkoa wa Kaskazini Unguja, Bi. Miza Ali Kombo amesema zoezi la Uchaguzi kwa ngazi ya Wadi linaendelea vizuri kwani wagombea tayari wamejaza fomu na kinachosubiriwa kwa sasa ni upigaji wa kura ili kupata viongozi watakaoongoza ngazi hiyo kwa miaka mitano.

Naye Katibu wa UWT Tawi la Muange, Bi. Waja Mnadhani Ali alieleza maratajio yake baada ya kupata nafasi hiyo atafanya kazi za jumuiya na chama kwa umakini na uadilifu ili kuwawakilisha vyema wanawake waliomuamini na kumpa ridhaa ya uongozi huo.

Zanzinews

Share:

2 comments

  1. Ashakh (Kiongozi) 17 Juni, 2017 at 08:16

    Hii ni Jumuiya ya CCM au ni Jumuiya ya Tanzania?

    Maana tumeona UVCCM, lakini hii bado inaitwa UWT sijuwi kirefu chake nini?

    Turudi kwenye mada. Serikali wanayo wao, nyenzo zote wanazo wao, sasa wanapowambia wachangamkie fursa hapa inamaanisha dhihaka. Hivi tuseme pamoja na shida zote hizo walizonazo wananchi iwe hawataki hizo fursa, iwe wamelegea au nikuwa hazipo na hawepewi

  2. Tengoni 17 Juni, 2017 at 11:14

    UWT. kirefu chake ni Umoja wa Wanawake Tanzania, hili jina limerithiwa tangu wakati ule vyama vingi bado, kwa kweli hata hiyo CCM, ilikuwa haijazaliwa, ni jina lilitumika tangu enzi za TANU, wakati huo akivuma Sofia Kawawa, kama kiongozi wa UWT. Unajuwa tena kuja CCM, vya ASP vyote vikenda kwenye dustbin, maazimio yao na tasisi zao. Umoja wa Wanawake wa ASP ulikuwa na ufanisi, chini ya Fatma Karume kuliko ule wa TANU, lakini UWT ya TANU ikipita, Volunteer wa ASP walikuwa smart na discipline kuliko mgambo shahala bahala wa TANU, lakini mgambo likapita kwenda CCM, hivyo hivyo YoungPioneers wa ASP, walikuwa mbingu na ardhi na chipukizi ya TANU, lakini chipukizi hovyo ikarithiwa na CCM. Maazimio ya mikutano mikuu ya ASP, hayakurithiwa hata moja na CCM, lakini maazimio ya TANU yote yamepita na kuwa ya CCM, ikiwemo la Arusha na makao makuu ya chama na serikali kuwa Dodoma. Kwa kweli hi nchi ni upande mmoja Majuha na mwengne Abunuwas.

Leave a reply