Wasomi: Bilal turufu ya CCM

UTEUZI wa Dk Mohammed Gharib Bilal kuwa mgombea mwenza wa Rais Jakaya Kikwete umeelezewa na wachambuzi wa mambo ya siasa kuwa ni karata nzuri kwa CCM, kwani utaepusha mgawanyiko wa chama hicho Zanzibar.

Wasomi kadhaa waliozungumza na gazeti hili jana, walisema Dk Bilal ana wafuasi wengi Unguja, hivyo kitendo cha kumwengua kugombea urais wa Zanzibar, kingewafanya wafuasi wake wasimuunge mkono mgombea wa CCM visiwani humo ambaye ni Dk Ali Mohamed Shein.

Kutajwa kwa jina la Dk Bilal kuwa mgombea mwenza, hakukutarajiwa na wengi, kwani hata waliokuwa wanatajwa nyota yao kung’ara kwa nafasi hiyo, jina la mwanasiasa huyo halikuwamo.

Awali waliokuwa wanatajwa ni Waziri Kiongozi Shamsi Vuai Nahodha, Mohamed Seif Khatib na Zakhia Hamdun Meghji.

Lakini juzi usiku, Rais Kikwete alimtangaza Dk Bilal kuwa mtu atakayemsaidia kupeperusha bendera ya chama chake, kuomba ridhaa ya wananchi wamchague tena kumalizia kipindi chake cha miaka mitano chini ya kaulimbiu ya Ari zaidi, Nguvu zaidi na Kasi zaidi.

“CCM wamefanya kitendo cha busara kisiasa, kwa hali ilivyo visiwani, kwa sasa ni wazi kuwa kama Dk Bilal angekosa hata hicho alichopewa, kungekuwa na mgawanyiko mkubwa,” alisema Mhadhiri wa Chuo Kikuu cha Dar es Salaam, Profesa Samwel Mushi.

Profesa Mushi alisema kinachozungumzwa visiwani Zanzibar kwa sasa ni maridhiano ya kisiasa na akasisitiza kuwa maridhiano hayo hayawezi kuendelezwa kama ndani ya CCM kuna watu wana kinyongo, ndio maana CCM wakatumia busara, angalau kila mtu apate.

Msomi huyo alisema jambo lolote ambalo linasababisha kutoelewana ndani ya CCM, ni lazima waliuzie na ndiyo maana wameamua kuingiza wadau wakuu wa siasa katika kugombea nafasi mbalimbali, “cha msingi pale hakuna aliyetoka bure.”

Alisema uteuzi wa Dk Bilal utaimarisha nguvu ya chama hicho Unguja na kumrahisishia kampeni Dk Shein ambaye aliteuliwa kugombea urais wa Zanzibar kwa kumshinda kwa mbali Dk Bilal. Naye Dk Mohamed Bakari wa Chuo Kikuu hicho, alisema suala la ugombea mwenza ndani ya CCM halitokani na mapenzi ya mgombea, bali kushauriana na kuona kumteua Dk Bilal ndiyo njia pekee ya kupunguza msuguano ndani ya chama hicho.

“Yawezekana Rais Kikwete alikuwa na mtu wake, lakini apende au asipende, hakukuwa na njia nyingine zaidi ya kumteua Dk Bilal ili kuziba mashimo yaliyoko visiwani Zanzibar,” alisema Dk Bakari.

Dk. Bakari alikiri kuwa Dk Bilal ana wafuasi na ngome kubwa ya kisiasa Unguja, hivyo kitendo cha CCM kumteua kuwa mgombea mwenza, ni wazi kuwa mashimo yaliyokuwa yamechimbika sasa yamefukiwa.

Pia alisema Dk Bilal anawakilisha kundi la wahafidhina visiwani humo hivyo kitendo cha kumwingiza kwenye mfumo wa uongozi ni wazi kuwa ni lazima kundi hilo lishiriki kuendeleza maridhiano ya kisiasa yaliyofikiwa kati ya Rais Amani Abeid Karume na Maalim Seif Sharrif Hamad.

“Huyu Dk Bilal anawakilisha kundi la wahafidhina, hivyo kuingizwa kwenye system (mfumo) ya uongozi utawafanya na wao washiriki kwenye maridhiano hayo ya kisiasa na hawatakuwa na haja ya kuyapinga tena,” alisema msomi huyo.

Hivyo alisema ilikuwa sahihi kwa CCM katika kipindi hiki cha maridhiano, kumteua Dk Bilal kuwa mgombea mwenza, kwani itaifanya CCM visiwani Zanzibar waendelee kuwa kitu kimoja.

Profesa Issa Shivji katika maoni yake kwa gazeti hili alisema, “Safari hii CCM imecheza karata yake ya kisiasa vizuri kwa kumteua Dk Bilal awe mgombea mwenza wa Kikwete.” Shivji, ambaye ni mhadhiri mstaafu wa Chuo Kikuu cha Dar es Salaam, alisema Dk Bilal tangu aanze kugombea nafasi ya urais wa Zanzibar amekuwa anaungwa mkono na Wazanzibari wengi, hivyo kumwacha nje ya mfumo wa uongozi kungesababisha mgawanyiko mkubwa ndani ya chama hicho.

Msomi huyo alisema mkakati wa kisiasa wa kumchagua kuwa mgombea mwenza, kwanza umeondosha hali ya sintofahamu iliyokuwapo Unguja na pia CCM wamefanya hivyo ili kupoza wafuasi wa kiongozi huyo, ambaye amewahi kushika uwaziri kiongozi enzi za uongozi wa Dk Salmin Amour.

Aliendelea kusema kuwa kwa siasa za Zanzibar zilivyo, si vizuri ndani ya CCM kuwa na machafuko, kwani hiyo inaweza kurejesha nyuma siasa za maridhiano, ambazo zinaonekana kukubalika visiwani humo na walio wengi.

Naye Issa Yussuf anaripoti kutoka Zanzibar kwamba CCM imeandaa mkutano mkubwa wa hadhara keshokutwa mjini hapa kuwatambulisha wagombea wake katika uchaguzi mkuu wa Oktoba mwaka huu. “Tunaandaa mkutano wa hadhara kuwatambulisha wagombea wetu Julai 15 mwaka huu mjini hapa. Rais Karume anatarajiwa kuwatambulisha: Kikwete (anayegombea uraia wa Muungano), Dk Bilal (mgombea mwenza) na Dk Shein (urais Zanzibar),” alisema Katibu wa Uenezi na Itikadi CCM Zanzibar, Vuai Ali Vuai.

Vuai alisema maandalizi ya mapokezi hayo yanakwenda vizuri, na kuwataka wanachama na wafuasi wa CCM Zanzibar kujitokeza siku hiyo kwa wingi “kama ratiba haitabadilika.”

Akizungumzia taarifa kwamba baadhi ya wanachama wa CCM Zanzibar hawakufurahia uteuzi wa Dk Shein na Bilali, Vuai alisema, “tunatarajia wana CCM wote Zanzibar kuungana na kuzika tofauti zao ili kupata ushindi wa kishindo katika uchaguzi mkuu ujao.”

Hadi jana mchana, maeneo mengi mashuhuri ya CCM yalikuwa kimya wengi wa wanachama wakichelea kutoa maoni yao juu ya uteuzi wa viongozi hao wawili. “Hakuna dosari zozote katika uteuzi huo wa chama, tumepata wagombea wazuri watakaotupeleka kwenye ushindi,” alisema Mussa Ameir, mpenzi wa CCM wa Rahaleo, lakini mwenzake ambaye hakutaka atajwe jina, alisema “tulitaka Dk Bilal ndiye agombee urais Zanzibar.

Hatukufurahi, lakini hatuwezi kubadili matokeo.” Hamid Mbwezeleni, mwanasheria mashuhuri wa hapa, alisema, “kwa kuwa CCM imeshafanya chaguo lake, hakuna kibaya. Kutofurahishwa kwa baadhi ya wana CCM Zanzibar hakuwezi kuhalalisha madai yao, wanatakiwa kukubaliana na uamuzi wa chama.”

Hamad Mussa wa CHADEMA alikuwa na maoni kwamba sasa Zanzibar inaelekea kwenye mustakabali mzuri wa mabadiliko makubwa katika siasa, “kwa kuwa Wazanzibari sasa wanatarajia kupata rais wa kwanza kutoka Pemba kama Shein atashinda kwa tiketi ya chama chake.”

Katika mkutano wa kuwatambulisha wagombea wa CCM katika uchaguzi mkuu ujao jana, Dk. Bilal huku akimuita Dk. Shein kuwa ni rais mtarajiwa wa Zanzibar, aliahidi kushirikiana naye kuhakikisha CCM inapata ushindi mkubwa Zanzibar.

Akizungumza katika mkutano huo uliofanyika katika Uwanja wa Jamuhuri Dodoma na kuhudhuriwa na mgombea wa urais wa Jamuhuri ya Muungano wa Tanzania, Rais Jakaya Kikwete na Dk. Shein, Dk. Bilal alisema atachapa kazi na kutumia mwisho wa jasho lake kuhakikisha Tanzania inanawiri.

“Naahidi kufanya kazi ya kumsaidia Rais wa Jamuhuri ya Muungano wa Tanzania na Rais wa Zanzibar kwa moyo wangu wote, kwa uwezo wangu wote na kwa ujasiri wangu wote,” alisema Dk. Bilal.

Dk. Bilal alisema atatumia maelekezo ya Rais wa Jamuhuri ya Muungano wa Tanzania na Rais wa Zanzibar, kuhakikisha Watanzania wanapata maisha bora.

Source: Habari Leo