Visiwa virudishe asili yake, silka na utamaduni wetu.

Na.B.OLE,

Kila jamii ina asili na hulka yake na mara nyingi hufatana na mila, desturi na silka za watu wake katika jamii inayohusika. Asili huandamana na haiba na mapenzi ambayo hujenga udugu na upendo miongoni mwa wahusika, pia huwa ni itikadi yenye kuonesha asili au chimbuko lake katika maisha ya kila siku.

Ikiwa itikadi hiyo itafuatwa ipaswavyo,bila shaka hapo ndipo utapoikuta jamii ile inaishi kwa furaha na faraja,Wanajamii wakifurahia matunda mazuri yenye baraka, upendo na ufanisi, kinyume chake ikiwa jamii hiyo hiyo itapuuza na kuiga mambo ambayo hayakuzoeleka na wala hayana faida na wao, basi ni dhahiri jamii hii itaharibika nakupoteza mwenendo mzima wa maisha yao.

Wazanzibar hatuna budi kujiuliza ile fahari yetu ya visiwa, asili, haiba,desturi na silka zetu visiwani zimeenda wapi ? Leo hii haiba ya Visiwa vyetu imepotea, tumeacha yale ya kwetu tumevamia na kuvaa majoho ya wenzetu kwa kuacha mila na desturi zetu jambo ambalo kama hatukuliangalia kwa undani tutakuja kupoteza ile fahari yetu kwa vizazi vyetu.

Sote tunaelewa kwamba hali zetu ni ngumu, lakini haihalalishi kuacha yale yetu ambayo ni mazuri na kuiga ya wengine kwa sababu tu tunataka kwenda na wakati, au pengine kutaka kujipatia kipato zaidi kwa maana hiyo takapuuza mila na asili zetu.

Leo hii Visiwa vimegeuka ni sehemu ya kuuzia Masanam lakini wanaojifanya wajanja wamegeuza miondoka wanaiita ni vinyago kwa ajili ya watalii, lakini wenye akili na Elimu zao za dini wanaelewa kwamba sanamu ni sanamu tu hata ukilita kinyago haliwezi kubadilisha dhana hiyo na wala dhambi zake haziwezi kupungua au kuepukika kwa kubadilisha usanii wa jina.Na wala Utalii hauwezi kuchukuliwa kuwa ni kigezo cha kuhalalisha hayo. Vinyago sio asili yetu wala na wala haviendani na mila na desturi zetu za dini hapa Zanzibar.

Hivi kweli Visiwa vyetu hakuna mambo ya kujivunia mpaka tuchonge Vinyago ? Zile nakshi nzuri za milango na viungo vyenye harufu nzuri, matunda na mandhari nzuri haiwezi tosha kuwa ni vivutio vya Watalii ? au ndio ule msemo wa kale, unaosema ukikaa ma muwaridi basi na wewe huachi kunukia ? Sasa mimi naona hatunukii na badala yake Zanzibar inanuka.

Sio ubaguzi lakini naona sio asili yetu , itakapotokea kumuona mtoto wa Kinzanzibar akiacha kuvaa kanzu yake ya darzi, makubazi na kofia ya msikitini na badala ukamuona kajifunga Rubega na mishale kama vile tuko mawindoni tunawinda paa, litakuwa ni jambo la kushangaza sana kwani hio sio asili yetu, na huku ndiko Zanzibar inakoelekee kwa sasa. Kisingizio utaambiwa tunatafuta meandeleo na vivutio vya Watalii.

Lakini pia madanguro na mabaa yamekuwa ni sehemu nyeti na Biashara kubwa visiwani ambayo inashamiri kila kona,inasikitisha na kutia huzuni na aibu kuona Zanzibar imekuwa ni kituo cha Wanawake kuja kujiuza (changu doa) na sehemu ya unywaji wa pombe kali za kila aina, jamani hii ndio ile Zanzibar yetu tulioizoea na mila zetu na asili yetu ndio hii.

Naelewa kuna wengine hawatapenda lakini hii ndio hali ilivyo, na Wahusika tumetia pamba masikioni hatutaki kulizungumzia hili matokeo yake tunaona ni fahari kwa Zanzibar kutangiziwa kama ni Kisiwa cha Maraha . Nasema huu ni upotofu na upotevu wa mila na desturi zetu na sijambo la kujifaharishia nalo. Tukumbuke tunachokipanda ndicho tutakachokuja kuvuna, jamii ya Kizanzibar inapotea kukumbusha ni wajibu.

Imekuwa ni jambo la kawaida kwa sasa hata maamkizi yetu tuliozoea Visiwani yanapotea na badala yake utasikia lugha za ajabu ajabu, vipi kaka mambo ! inakuwaje kaka ! badala ya subal kheri na Assallam Alleikum maamkizi yenye unyenyekevu na heshima kubwa kwetu.

Ukija kwenye mavazi hapa ndio utakuwa umefika mwisho wa maono yako, kwani kinachovaliwa hakijulikani kisingizioo ni” Fashion” tunaenda na wakati lakini jamani haya mambo yanaendana na mila zetu na asili zetu, jee yanakubalika na miongozo ya dini yetu.

Nasema kuna haja ya kurudisha asili pamoja na mila, desturi na silka za Kizanzibar kabla kizazi chetu hakijapotea zaidi,mimi sioni mantiki ya kuiga jamii nyengine ambazo haziendani na hazikubaliki katika maadili ya Wazanzibar. Kuna haja ya kujivunia kizuri chetu ambacho ni asili na mila zetu, hii ndio fahari yetu.