Habari

Dr Shein azindua mfumo uimarishaji usajili

September 4, 2018

Ahimiza uadilifu kwa watendaji

NA HAFSA GOLO

RAIS wa Zanzibar na Mwenyekiti wa Baraza la Mapinduzi, Dk. Ali Mohamed Shein, amesema serikali inahitaji viongozi na watendaji wenye uadilifu na uaminifu, ili malengo yanayopangwa na kutekelezwa yaweze kufikiwa kwa ufanisi.

Dk. Shein alieleza hayo jana wakati akizindua uimarishaji wa mfumo wa usajili, zoezi la kuimarisha taarifa za vitambulisho na Ofisi za Usajili za wilaya za wakala wa usajili wa matukio ya kijamii Zanzibar, huko Dunga wilaya ya Kati.

Alisema lazima watu wafanyekazi kwa kuheshimu na kuzingatia misingi ya utawala bora, miongozo ya kisheria na kuepuka vitendo vya upendeleo, kwani haviwezi kuleta mafanikio.

Dk. Shein aliwataka watendaji wanaosimamia usajili kutekeleza vyema majukumu yao ya kazi, kwa kuongozwa na weledi bila ya kuwa na woga kwani wanajukumu la kukusanya takwimu sahihi.

Alisema mipango mizuri ya serikali katika masula ya kuimarisha maendeleo na huduma za wananchi katika sekta mbalimbali ikiwemo afya, elimu na upatikanaji wa maji safi na salama inafikiwa kwa upatikanaji wa takwimu zilizosahihi.

Aliwataka kutoruhusu utoaji mwanya kwa watu wanaotaka kughushi taarifa za kijamii, kwani itachangia kuharibu usalama wa nchi.

Alisema Zanzibar inahitaji amani na utulivu katika uimarishaji wa maendeleo ya kijamii na kiuchumi hivyo wahakikishe lazima watu wote wanatoa taarifa vizuri na kwa usahihi.

Sambamba na hilo, aliwataka watendaji kuhakikisha wakati wanapowahudumia wananchi wanatumia lugha nzuri zenye busara na hekma na ni vyema kuepuka tabia ya kuwakaripia.

Dk.Shein alisema, anafahamu katika utekelezaji wa mfumo huo mpya wa usajili kutajitokeza changamoto nyingi, hivyo aliwataka wasiogope na wahakikishe wanazipatia ufumbuzi kwa maslahi ya taifa.

Aidha alisema anafahamu jitahada zilizofanyika katika kuwasajili Wazanzibari 712,982 na kukusanya mapato ya milioni 154.726 katika mwaka 2017 hadi 2018 kutokana na malipo mbalimbali.

Zanzibarleo

Tagsslider
Share: